GAIA –ს ერთი წელი

ესთეტიკური მედიცინის საერთაშორისო ასოციაცია GAIA სფეროში მომუშავე სპეციალისტების მიერ  ერთი წლის წინ დაარსდა. მიზანი საქართველოში ესთეტიკური მედიცინის განვითარება და სტანდარტების ამაღლება იყო, რადგან ესთეტიკური მედიცინა საქართველოში საკმაოდ სწრაფად ვითარდება. მასზე მოთხოვნა მაღალია, მაგრამ ამასთან ერთად, არსებობს გარკვეული გამოწვევები, რომელთაც გადაჭრა სჭირდება.

GAIA-ს მთავარი მიზანია, საზოგადოებაში ესთეტიკური მედიცინის სფეროს სანდოობის გაზრდა, სპეციალისტების კვალიფიკაციის გაუმჯობესება, პაციენტების უსაფრთხოების გაძლიერება და სამართლებრივი უფლება-მოვალეობების შესახებ ცნობიერების ამაღლება. ასოციაცია აქტიურად თანამშრომლობს სახელმწიფო უწყებებთან, რათა სფეროს რეგულაცია და განვითარება კიდევ უფრო ეფექტური და საჭიროებებზე მორგებული გახდეს.

ერთწლიანი საქმიანობის განმავლობაში GAIA-მ სხვადასხვა მნიშვნელოვანი ნაბიჯი გადადგა. ასოციაციაში გაერთიანდა 500-მდე მოქმედი სპეციალისტი, ჩატარდა პირველი მასშტაბური კონფერენცია, სადაც წევრებს შესაძლებლობა ჰქონდათ ერთმანეთისთვის გამოცდილება გაეზიარებინათ და მიეღოთ ინფორმაცია სფეროს უახლესი ტენდენციების შესახებ. კონფერენციაზე მონაწილეებს გადაეცათ GAIA-ს წევრობის დამადასტურებელი სერტიფიკატები.

შეიქმნა ასოციაციის ვებ-გვერდი, სადაც განთავსდა წევრების მონაცემები, რაც ნებისმიერ დაინტერესებულ პირს შესაძლებლობას აძლევს, გაეცნოს მისთვის სასურველი სპეციალისტის კვალიფიკაციასა და გამოცდილებას. ამასთან, შეიქმნა GAIA-ს საკომუნიკაციო არხები, სადაც ქვეყნდება ინფორმაცია ესთეტიკური მედიცინის სიახლეებისა და ღონისძიებების შესახებ. ასოციაციის წევრებისთვის მოქმედებს სპეციალური ფასდაკლებები პარტნიორი ორგანიზაციების მიერ ორგანიზებულ ღონისძიებებზე. GAIA აქტიურად აწარმოებს მოლაპარაკებებს ევროპის და აშშ-ის ესთეტიკური მედიცინის ასოციაციებთან სამომავლო პარტნიორობისთვის. ეს თანამშრომლობა მნიშვნელოვან შესაძლებლობებს შექმნის როგორც ასოციაციის, ასევე მისი წევრების პროფესიული განვითარებისა და საერთაშორისო ინტეგრაციისთვის.

GAIA-ს მნიშვნელოვანი სამომავლო გეგმები აქვს. პროფესიული განვითარების მიზნით დაგეგმილია ტრენინგები, სემინარები და ვებინარები, რომლებიც დაეხმარება წევრებს 2025 წლის გაიდლაინებისა და ახალი ტექნოლოგიების გაცნობაში. ასევე, ასოციაცია წევრებს მიაწვდის ინფორმაციას მსოფლიოს მასშტაბით დაგეგმილ საერთაშორისო კონფერენციებთან დაკავშირებით, შეიმუშავებს სისტემას, რომელიც დაითვლის სპეციალისტების სამუშაო გამოცდილებას, რაც თითოეული მათგანისთვის იქნება ძალიან მნიშვნელოვანი. დაგეგმილია შეიქმნას ექსპერტთა სპეციალური ჯგუფები, რომლებიც ასოციაციის წევრებს დახმარებას გაუწევენ არა მხოლოდ სამედიცინო, არამედ იურიდიულ, ფინანსურ და მარკეტინგულ საკითხებშიც.

GAIA-ს წევრობა ესთეტიკური მედიცინის სპეციალისტებისთვის  შესაძლებლობაა ჰქონდეთ წვდომა უნიკალურ პლატფორმაზე, რომელიც აერთიანებს პროფესიონალებს, ცოდნას, მხარდაჭერას და ახალ შესაძლებლობებს. თუ თქვენც მუშაობთ ესთეტიკური მედიცინის სფეროში და გსურთ გახდეთ მისი სტანდარტების გაუმჯობესების ნაწილი, GAIA სწორედ ის ადგილია, რომელიც დაგეხმარებათ პროფესიულ ზრდასა და განვითარებაში.